Azərbaycan xalqının müasir tarixində mühüm yer tutan və dövlətçilik salnaməmizin ən şərəfli səhifələrindən birini təşkil edən 15 İyun – Milli Qurtuluş Günü ölkəmizin taleyində dönüş nöqtəsi olmuşdur. Bu əlamətdar tarix Azərbaycan dövlətinin dağılmaq təhlükəsindən xilas olduğu, milli birliyin təmin edildiyi, siyasi sabitliyin bərpa olunduğu və gələcək inkişafın möhkəm təməllərinin qoyulduğu gün kimi xalqımızın yaddaşında əbədi yaşayır.
Müstəqilliyini bərpa etdikdən sonra Azərbaycan Respublikası çox mürəkkəb siyasi, iqtisadi və hərbi problemlərlə üzləşmişdi. Ermənistanın Azərbaycana qarşı apardığı işğalçılıq siyasəti nəticəsində torpaqlarımızın bir hissəsi işğal olunmuş, yüz minlərlə soydaşımız qaçqın və məcburi köçkün vəziyyətinə düşmüşdü. Ölkə daxilində isə siyasi çəkişmələr, hakimiyyət böhranı və idarəetmədə yaranan ciddi problemlər dövlətçiliyimizi təhlükə altına qoymuşdu.
1993-cü ilin iyun hadisələri Azərbaycanın gələcək taleyinin həll olunduğu ən kritik dövrlərdən biri kimi tarixə düşmüşdür. Həmin vaxt ölkədə yaranmış gərgin vəziyyət vətəndaş qarşıdurması təhlükəsini daha da artırmış, dövlət institutlarının fəaliyyətinə ciddi zərbə vurmuşdu. Respublikada hökm sürən qeyri-sabitlik Azərbaycanı parçalanmaq və müstəqilliyini itirmək təhlükəsi ilə üz-üzə qoymuşdu.
Belə bir ağır vəziyyətdə xalq öz ümidlərini böyük dövlətçilik təcrübəsinə malik olan Heydər Əliyevə bağladı. Azərbaycan xalqının təkidli tələbi ilə Ulu Öndər Heydər Əliyevin yenidən siyasi hakimiyyətə qayıdışı ölkənin taleyində dönüş nöqtəsinə çevrildi. 1993-cü il iyunun 15-də Heydər Əliyevin Azərbaycan Respublikası Ali Sovetinin Sədri seçilməsi ilə ölkədə yeni siyasi mərhələnin əsası qoyuldu.
Bu tarix təsadüfi olaraq Milli Qurtuluş Günü adlandırılmamışdır. Məsələ burasındadır ki, həmin gün Azərbaycan dövlətçiliyi məhv olmaq təhlükəsindən xilas edildi. Məhz buna görə də 15 İyun müasir Azərbaycan tarixində xüsusi əhəmiyyətə malik olan milli bayram kimi qeyd olunur.
Ulu Öndər Heydər Əliyevin hakimiyyətə qayıdışından sonra ölkədə sabitliyin təmin olunması istiqamətində mühüm addımlar atıldı. Dövlət idarəçiliyində nizam-intizam bərpa edildi, qanunsuz silahlı dəstələrin fəaliyyəti dayandırıldı, vətəndaş qarşıdurmasının qarşısı alındı. İnsanlarda gələcəyə inam yarandı və dövlətə etimad gücləndi.
Heydər Əliyevin həyata keçirdiyi siyasətin əsas istiqamətlərindən biri hüquqi dövlət quruculuğu olmuşdur. Hüquq sisteminin təkmilləşdirilməsi, qanunun aliliyinin təmin olunması və insan hüquqlarının qorunması istiqamətində mühüm islahatlar həyata keçirilmişdir. 1995-ci ildə qəbul olunan Azərbaycan Respublikasının Konstitusiyası müasir dövlətçiliyimizin hüquqi əsaslarını formalaşdırmışdır.
Milli Qurtuluşun bəhrələri iqtisadi sahədə də özünü göstərmişdir. 1994-cü ildə imzalanan və sonradan “Əsrin müqaviləsi” adlandırılan neft müqaviləsi Azərbaycanın iqtisadi inkişafının təməlini qoymuşdur. Bu müqavilə ölkəyə iri həcmli investisiyaların cəlb edilməsinə, yeni iş yerlərinin açılmasına və iqtisadiyyatın sürətli inkişafına şərait yaratmışdır.
Siyasi sabitlik və iqtisadi inkişaf Azərbaycanın beynəlxalq aləmdə nüfuzunun artmasına da mühüm təsir göstərmişdir. Ulu Öndər Heydər Əliyevin müəyyən etdiyi xarici siyasət kursu nəticəsində Azərbaycan beynəlxalq münasibətlər sistemində etibarlı tərəfdaş kimi tanınmış, dünyanın aparıcı dövlətləri ilə qarşılıqlı faydalı əməkdaşlıq əlaqələri qurmuşdur.
Milli Qurtuluş Günü eyni zamanda milli həmrəyliyin və xalq-lider birliyinin təntənəsidir. Tarix sübut etdi ki, xalqın etimadı və Heydər Əliyevin siyasi müdrikliyi sayəsində Azərbaycan ən ağır sınaqlardan şərəflə çıxmağı bacardı. Bu gün hər bir vətəndaş yaxşı anlayır ki, əgər 1993-cü ildə həmin tarixi qərar qəbul edilməsəydi, Azərbaycanın gələcək taleyi tamamilə fərqli ola bilərdi.
Bu gün Prezident İlham Əliyev tərəfindən Ulu Öndər Heydər Əliyevin siyasi kursu uğurla davam etdirilir. Azərbaycanın hərtərəfli inkişafı, iqtisadi qüdrətinin artması, beynəlxalq nüfuzunun yüksəlməsi və dövlətimizin ərazi bütövlüyünün tam bərpa olunması məhz həmin strateji xəttin uğurlu nəticəsidir.
Xüsusilə son illərdə əldə edilən möhtəşəm uğurlar Milli Qurtuluş ideyalarının nə qədər uzaqgörən və möhkəm təməllərə söykəndiyini bir daha sübut etmişdir. Azərbaycanın suverenliyinin tam təmin olunması, Qarabağ və Şərqi Zəngəzurda genişmiqyaslı bərpa-quruculuq işlərinin həyata keçirilməsi müstəqil dövlətimizin gücünü və qüdrətini nümayiş etdirir.
15 İyun Milli Qurtuluş Günü yalnız keçmişin xatirəsi deyil, həm də gələcəyə ünvanlanmış mühüm mesajdır. Bu gün Azərbaycan xalqının milli birliyinin, dövlətçilik ənənələrinə sadiqliyinin və müstəqillik ideallarına bağlılığının təcəssümüdür. Hər il qeyd olunan bu əlamətdar tarix gənc nəslin vətənpərvərlik ruhunda tərbiyəsində, dövlətçilik düşüncəsinin formalaşmasında mühüm rol oynayır.
Milli Qurtuluş Günü Azərbaycan tarixində təkcə siyasi hadisə deyil, həm də xalqın öz dövlətinə sahib çıxmasının, müstəqilliyini qorumasının və gələcəyini müəyyən etməsinin parlaq nümunəsidir. Bu tarix Azərbaycan dövlətçiliyinin xilası, milli iradənin qələbəsi və böyük liderlik nümunəsi kimi daim yaşayacaqdır.
Bu gün qürurla deyə bilərik ki, 15 İyun 1993-cü ildə başlanan Qurtuluş yolu müasir Azərbaycanın inkişaf və tərəqqi yoluna çevrilmişdir. Dövlətimizin qazandığı bütün uğurların əsasında həmin tarixi günün yaratdığı siyasi sabitlik, milli birlik və güclü dövlətçilik fəlsəfəsi dayanır. Məhz buna görə də 15 İyun Milli Qurtuluş Günü Azərbaycan xalqının yaddaşında əbədi yaşayacaq, gələcək nəsillər tərəfindən də böyük ehtiramla xatırlanacaqdır.
