Paytaxtın Xan Şuşinski küçəsinin Rəşid Behbudov küçəsi ilə kəsişməsindən Vaqif prospekti ilə kəsişməsinədək olan hissəsində aparılan təmir işləri ilə əlaqədar nəqliyyat vasitələrinin hərəkətinə məhdudiyyət tətbiq edilib.

“Qafqazinfo” xəbər verir ki, bu barədə Azərbaycan Yerüstü Nəqliyyat Agentliyi (AYNA) məlumat yayıb.

Məhdudiyyət səbəbindən 3, 4, 17, 20, 85 və 88 nömrəli müntəzəm marşrutların hərəkəti iyulun 4-dək Abbasqulu ağa Bakıxanov və Ceyhun Hacıbəyli küçələri ilə təşkil edilir.

3-5 iyul tarixlərində isə Hüseyn Cavid prospektinin Əbdürrəhim bəy Haqverdiyev küçəsi ilə kəsişməsindən Lev Landau küçəsi ilə kəsişməsinədək olan hissəsində təmir işləri həyata keçiriləcək. Bununla əlaqədar 3, 6, 10, 17, 18 və 96 nömrəli marşrutların hərəkəti müvəqqəti olaraq Şəfayət Mehdiyev küçəsi və İnşaatçılar prospekti ilə təşkil ediləcək.

İyulun 12-də I və IV ixtisas qrupları üzrə ali təhsil müəssisələrinə qəbul imtahanı keçiriləcək.

“Qafqazinfo” xəbər verir ki, bu barədə Dövlət İmtahan Mərkəzi (DİM) məlumat yayıb.

İyulun 12-də III ixtisas qrupuna aid DT və TC altqruplarının hər ikisini seçənlər üçün coğrafiya fənni üzrə əlavə imtahan da keçiriləcək.

Qeyd olunub ki, imtahanda iştirak edəcək abituriyentlər buraxılış vərəqəsini çap edə bilərlər.

İyulun 2-si Azərbaycan Polisi Günüdür. Bu il Azərbaycan polisi özünün yaranmasının 108-ci ildönümünü qeyd edir. 1918-ci ildə Azərbaycan Xalq Cümhuriyyəti tərəfindən əsası qoyulan polis orqanları ötən 108 il ərzində dövlətçiliyimizin qorunmasında, ictimai asayişin təmin edilməsində, qanunun aliliyinin bərqərar olunmasında və milli təhlükəsizliyimizin möhkəmləndirilməsində mühüm rol oynayıb.

Bu gün Azərbaycan Polisi yalnız hüquq-mühafizə orqanı deyil, həm də dövlətimizin müstəqilliyinin, suverenliyinin və konstitusiya quruluşunun etibarlı dayaqlarından biridir. Xalqla dövlət arasında etimad körpüsü rolunu oynayan polis orqanları peşəkarlıq, vətənpərvərlik və sədaqət prinsiplərinə əsaslanaraq fəaliyyət göstərir. Azərbaycan polisinin keçdiyi şərəfli xidmət yolunda Qarabağ uğrunda aparılan mübarizə xüsusi yer tutur. Birinci Qarabağ müharibəsi illərində polis əməkdaşları yalnız daxili təhlükəsizliyin təmin olunması ilə kifayətlənməmiş, eyni zamanda ön cəbhədə erməni işğalçılarına qarşı qəhrəmanlıqla vuruşublar. Həmin dövrdə yüzlərlə polis əməkdaşı şəhidlik zirvəsinə yüksəlib, çoxsaylı əməkdaşlar yaralanaraq sağlamlıqlarını Vətən yolunda qurban veriblər. 2020-ci ildə baş vermiş 44 günlük Vətən müharibəsi Azərbaycan polisinin fədakarlıq salnaməsinə yeni şanlı səhifələr yazdı. Polis əməkdaşları həm döyüş bölgələrində, həm də arxa cəbhədə üzərlərinə düşən vəzifələri yüksək peşəkarlıqla yerinə yetirdilər. Azərbaycanın tarixi Zəfərinin əldə olunmasında onların xidmətləri danılmazdır. Vətən müharibəsi zamanı ön cəbhədə döyüşən hərbçilərimiz və polis əməkdaşlarımız arxada ailələrinin, yaxınlarının və bütün xalqımızın təhlükəsizliyinin etibarlı əllərdə olduğuna əmin idilər. Çünki ölkə daxilində sabitliyi, ictimai asayişi və təhlükəsizliyi qüdrətli Azərbaycan Polisi qoruyurdu. Bu amil ön xətdə döyüşən qəhrəmanlarımız üçün böyük mənəvi dayaq və əlavə güvən mənbəyi olub.

2023-cü ilin sentyabr ayında həyata keçirilən 23 saatlıq lokal antiterror tədbirləri zamanı da Azərbaycan polisi dövlətimizin ərazi bütövlüyünün və suverenliyinin tam bərpası prosesində mühüm rol oynadı. Azərbaycan Silahlı Qüvvələri ilə birlikdə həyata keçirilən uğurlu əməliyyatlar nəticəsində ölkəmizin bütün ərazisində konstitusiya quruluşu təmin edildi, dövlət suverenliyi tam bərpa olundu. Bu prosesdə də polis əməkdaşları yüksək peşəkarlıq, cəsarət və vətənpərvərlik nümayiş etdirdilər. Azərbaycan polisi yalnız müharibə dövründə deyil, sülh şəraitində də xalqına xidmət nümunəsi göstərir. Xüsusilə COVID-19 pandemiyası dövründə polis əməkdaşları gecə-gündüz xidmət apararaq karantin rejiminin tələblərinin yerinə yetirilməsini təmin etdilər, vətəndaşların sağlamlığının qorunmasına mühüm töhfələr verdilər. Eyni zamanda müharibə dövründə tətbiq olunan komendant saatı zamanı ölkə ərazisində sabitliyin və ictimai təhlükəsizliyin təmin olunması istiqamətində nümayiş etdirilən peşəkarlıq və fədakarlıq bir çox inkişaf etmiş ölkələrin hüquq-mühafizə orqanları üçün nümunə sayıla bilər. Müasir dövrdə təhlükəsizlik anlayışı daha mürəkkəb xarakter almışdır. Azərbaycan Polisi də fəaliyyətini dövrün çağırışlarına uyğun quraraq bütün cinayətkarlıq növlərinə qarşı qətiyyətli mübarizə aparır. İnsanlıq əleyhinə yönəlmiş insan alveri cinayətləri, cəmiyyət üçün ciddi təhlükə yaradan narkotik vasitələrin qanunsuz dövriyyəsi, transmilli mütəşəkkil cinayətkar qruplar və sürətlə genişlənən kibercinayətkarlıqla mübarizə polis orqanlarının əsas fəaliyyət istiqamətlərindən biridir. Bununla yanaşı, hava nəqliyyatında, su hövzələrində, dəmir yolu xətlərində, avtomobil yollarında və digər strateji əhəmiyyətli obyektlərdə təhlükəsizliyin təmin olunması da polis əməkdaşlarının peşəkar fəaliyyəti nəticəsində uğurla həyata keçirilir.

Bu gün Azərbaycan polisinin fəaliyyəti ölkənin təhlükəsizlik sisteminin bütün sahələrini əhatə edir. Azərbaycan polisi haqqında ən yüksək və dəyərli fikirlərdən birini Ümummilli Lider Heydər Əliyev söyləyib. Ulu Öndər polisi dövlətçiliyin ən etibarlı dayaqlarından biri kimi qiymətləndirərək bu peşənin cəmiyyət üçün əhəmiyyətini xüsusi vurğulayıb. Məhz Heydər Əliyev tərəfindən müəyyən edilmiş inkişaf strategiyası nəticəsində Azərbaycan polisi müasir və peşəkar hüquq-mühafizə orqanına çevrilib. Bu gün həmin siyasət Prezident, Müzəffər Ali Baş Komandan cənab İlham Əliyev tərəfindən uğurla davam etdirilir. Dövlət başçısının daim göstərdiyi diqqət və qayğı nəticəsində polis əməkdaşlarının sosial müdafiəsi gücləndirilir, xidmət şəraiti yaxşılaşdırılır, yeni inzibati binalar və yaşayış kompleksləri istifadəyə verilir, maddi-texniki baza müasir standartlara uyğun yenilənir.

Azərbaycan Polis Akademiyası isə ölkənin hüquq-mühafizə sisteminin peşəkar kadrlarla təmin edilməsində mühüm rol oynayır. Hər il Akademiyanı bitirən yüzlərlə gənc zabit Azərbaycanın müxtəlif bölgələrində xidmətə başlayaraq qanunun keşiyində dayanır, vətəndaşların hüquq və təhlükəsizliyinin qorunmasına öz töhfələrini verir. Bu gün Azərbaycan dünyanın ən təhlükəsiz ölkələrindən biri kimi tanınır. Ölkəmizdə mövcud olan ictimai-siyasi sabitlik, hüquq qaydası və təhlükəsizlik mühiti nəticəsində həm Azərbaycan vətəndaşları, həm də ölkəmizə gələn turistlər və xarici qonaqlar günün istənilən vaxtında sərbəst və təhlükəsiz şəkildə hərəkət edə bilirlər. Bu nailiyyətlərin əldə olunmasında Azərbaycan polisinin əməyi danılmazdır. Azərbaycan polisi bu gün hər bir vətəndaşın ümid yeri, arxa-dayaq nöqtəsi və güvən ünvanıdır. Polis-vətəndaş münasibətlərində formalaşmış qarşılıqlı etimad, insanların hüquq-mühafizə orqanlarına olan inamı və etibarı məhz polis əməkdaşlarının uzun illər ərzində göstərdikləri vicdanlı, peşəkar və fədakar xidmətin nəticəsidir.

108 illik şərəfli tarixə malik Azərbaycan Polisi bundan sonra da dövlətimizin və xalqımızın keşiyində ayıq-sayıq dayanacaq, ölkəmizin təhlükəsizliyinin, sabitliyinin və hüquq qaydasının qorunmasına öz töhfəsini verməyə davam edəcəkdir. Bu əlamətdar gündə bütün polis əməkdaşlarını, veteranları, şəhid ailələrini və xidmət borcunu şərəflə yerinə yetirən hər kəsi ürəkdən təbrik edir, Vətən uğrunda canından keçmiş qəhrəman polis şəhidlərimizin əziz xatirəsini dərin ehtiramla yad edirəm.

Ramiz Alıyev
İnsan Alverinə Qarşı Mübarizə Təşkilatının sədri

Tovuzda qətl törədilib.

“Qafqazinfo” xəbər verir ki, cinayət rayonun Eyyublu kəndində qeydə alınıb.

Belə ki, 32 yaşlı Elməddin Quliyev kəsici alətlə qətlə yetirilib.

Hadisəni törətməkdə şübhəli bilinən onun 1997-ci il təvəllüdlü həmkəndlisi Asəf Rüstəmov polis əməkdaşları tərəfindən saxlanılıb.

İlkin məlumata görə, hər iki şəxs spirtli içkinin təsiri altında olub.

Yunis Quliyev

Azərbaycanda yaş məhdudiyyəti tətbiq edilən sosial şəbəkə platformalarının fəaliyyəti ilə bağlı tələblərin pozulmasına görə yeni cərimələr müəyyənləşdiriləcək.

“Qafqazinfo” xəbər verir ki, bu barədə məsələ Milli Məclisin bugünkü iclasında müzakirə olunan İnzibati Xətalar Məcəlləsində dəyişiklik edilməsi barədə qanun layihəsində öz əksini tapıb.

“İnformasiya, informasiyalaşdırma və informasiyanın mühafizəsi haqqında” Azərbaycan Respublikası Qanununun 13-4.13-cü maddəsində qeyd edilən məlumatların müvafiq icra hakimiyyəti orqanının müəyyən etdiyi orqana (quruma) təqdim edilməməsinə və ya təqdim edilməsi müddətinin pozulmasına, yaxud natamam və ya təhrif edilmiş məlumatın təqdim edilməsinə görə vəzifəli şəxslər 6000 manatdan 7000 manatadək məbləğdə, hüquqi şəxslər 15 min manatdan 20 min manat manatdək məbləğdə cərimə ediləcək.

Müvafiq icra hakimiyyəti orqanının müəyyən etdiyi orqanın (qurumun) göndərdiyi sorğuların yaş məhdudiyyəti tətbiq edilən sosial şəbəkə platformasının provayderi tərəfindən 5 iş günü ərzində cavablandırılmamasına, yaxud natamam və ya təhrif edilmiş məlumatların təqdim edilməsinə görə vəzifəli şəxslər 7000 manatdan 8000 manatadək məbləğdə, hüquqi şəxslər 25 min manatdan 30 min manatadək məbləğdə cərimə ediləcək.

Yaş məhdudiyyəti tətbiq edilən sosial şəbəkə platformalarından təhlükəsiz istifadə ilə bağlı tələblərin pozulmasına, yəni:

- fərdi rəqəmsal hesabın yaradılması zamanı "İnformasiya, informasiyalaşdırma və informasiyanın mühafizəsi haqqında” Qanunun 13-4.2-ci və 13-4.4-cü maddələrində müəyyən edilmiş texniki üsulların tətbiq edilməməsinə və ya həmin Qanunun 13-4.2 - 13-4.5-ci maddələrinin tələbləri pozulmaqla tətbiq edilməsinə;

- 16-18 yaş arası istifadəçilərin fərdi rəqəmsal hesablarına münasibətdə “İnformasiya, informasiyalaşdırma və informasiyanın mühafizəsi haqqında” Qanunun 13-4.11-ci maddəsində göstərilən texniki və təhlükəsizlik tədbirlərinin təmin edilməməsinə;

- 16-18 yaş arası istifadəçilərin həyatına, sağlamlığına, cinsi toxunulmazlığına, şərəfinə, ləyaqətinə və qanunla qorunan digər hüquq və azadlıqlarına təhlükə yaradan zərərli məzmunların yayılmasının qarşısının alınması üçün platformada fasiləsiz rejimdə fəaliyyət göstərən və operativ müdaxiləni təmin edən rəqəmsal həllərin tətbiq olunmamasına, yaxud zərərli məzmunun aşkar edildiyi andan etibarən 24 saat ərzində yayılmasının qarşısının alınmamasına;

- toplanılmış fərdi məlumatların sosial şəbəkə platformaları provayderlərinin informasiya sistemində saxlanılmasına, həmin məlumatların üçüncü şəxslərə ötürülməsinə və ya fərdi məlumatlardan yaşın yoxlanılması məqsədi istisna olmaqla, kommersiya, hədəfli reklam (konkret istifadəçiyə yönələn) və ya digər məqsədlər üçün istifadə edilməsinə;

- fərdi rəqəmsal hesabı olan şəxsin yetkinlik yaşına çatanadək yerləşdirdiyi məlumatların, paylaşdığı məzmunun və fərdi məlumatlarının özünün, yetkinlik yaşına çatmadığı halda qanuni nümayəndəsinin və ya müvafiq icra hakimiyyəti orqanının müəyyən etdiyi orqanın (qurumun) müraciəti əsasında silinməsinin təmin edilməməsinə görə vəzifəli şəxslər 8000 manatdan 9000 manatadək məbləğdə, hüquqi şəxslər 35 min manatdan 40 min manatadək məbləğdə cərimə ediləcək.

Yuxarıdakı nəzərdə tutulmuş bütün xətaların inzibati tənbeh almış şəxs tərəfindən inzibati tənbeh vermə haqqında qərar qüvvəyə mindiyi gündən bir il ərzində təkrar törədilməsinə görə vəzifəli şəxslər 9000 manatdan 10 min manatadək məbləğdə, hüquqi şəxslər 45 min manatdan 50 min manatadək məbləğdə cərimə ediləcək.

Müzakirələrdən sonra məsələ səsverməyə qoyularaq üçüncü oxunuşda qəbul edilib.

Nuranə Daxilqızı

“Bakı şəhərində, bölgələrdə xeyli sayda repetitorlarımız var ki, onların aylıq orta gəliri ölkədə olan orta əməkhaqqıdan qat-qat yuxarıdır. Belə adamların sayı az deyil”.

“Qafqazinfo” xəbər verir ki, bunu “Sertifikatlaşdırma: səriştəli müəllim - keyfiyyətli təhsil” mövzusunda keçirilən tədbirdə elm və təhsil naziri Emin Əmrullayev jurnalistlərin suallarını cavablandırarkən bildirib.

Nazir qeyd edib ki, bizdə 90-cı illərdən yazıq müəllim anlayışı, imici qalıb ki, müəllim yazıqdır. Əslində müəllimə yazıq kimi baxılmamalıdır: “Mənə görə müəllim yazıq deyil, peşəkardır. Müəllim bacarıqlıdır, gəlin o psixikanı dəyişək. Biz nə qədər müəllimimizi özümüz, müəllim özü, ətrafdakı insanlar yazıq adam kimi təqdim edəcəksə, müəllim də özünü yazıq görəcək, deyəcək yazığam axı mənə bir güzəşt edin.

Elə yazıq adamdan hələ hörmətli nəsil necə yetişdirəcəksiniz? Ona görə müəllim yazıq deyil, mənim anlayışımda bizim müəllimlərimiz qürurlu insanlardır. Ona görə o yazıqlıq məsələsi, məncə, keçmişdə qalıb artıq, növbəti nəsil müəllimlərimiz özlərini yazıq kimi görməməlidirlər. Çünki müəllim niyə yazıq olsun ki? İş yeri var, əməkhaqqısı var, uşaqlarla işləyir, ölkə üçün çox faydalı bir işlə məşğuldur. Ətrafdakılar da onlara yazıq kimi baxmamalıdırlar. Müəllimin əməkhaqqısı ölkədə aşağı məbləğ deyil. Bunu rəqəmlərlə göstərə bilərik”.

Gülnar Əliyeva

Məcburi köçkün statusunun qanunvericilik çərçivəsində yenidən tənzimlənməsi qanunla müəyyənləşir.

“Qafqazinfo” xəbər verir ki, bu, Milli Məclisinin bu gün keçirilən iclasında müzakirəyə çıxarılan “Qaçqınların və məcburi köçkünlərin (ölkə daxilində köçürülmüş şəxslərin) statusu haqqında” qanuna təklif edilən dəyişiklikdə əksini tapıb.

Qüvvədə olan qanunvericiliyə görə, məcburi köçkün əvvəl adətən yaşadığı yerə qayıtdıqda və ya əvvəlki yaşayış yerinin əvəzinə həmin regionda müəyyənləşdirilmiş ölçüdə başqa yaşayış yeri ilə əvəzsiz qaydada təmin edildikdə, eyni zamanda dövlətin xüsusi qərarı ilə müəyyənləşdirilmiş səviyyədə yaşayış yeri ilə təmin edildikdə statusunu itirir.

Layihəyə əsasən, vətəndaş yuxarıda qeyd edilən yaşayış yerlərindən imtina etdikdə də bu statusunu itirəcək.

Keçid müddəasına əsasən, bu qanun qüvvəyə mindiyi tarixədək əvvəlki yaşayış yerinin əvəzinə işğaldan azad edilmiş ərazilərdə başqa yaşayış yeri ilə əvəzsiz qaydada təmin edilmiş məcburi köçkünlərin məcburi köçkün statusu bu Qanun qüvvəyə mindiyi tarixdən itirilir.

Yeni təklifə əsasən şəxs yaşadığı regionda müəyyənləşdirilmiş ölçüdə başqa yaşayış yeri ilə əvvəlki yaşayış yerinin əvəzinə təmin ediləcək, bununla da dövlət tərəfindən yeni yaşayış sahəsinin verilməsi vətəndaşın mülkiyyət hüququnun tam bərpasına xidmət edəcək.

Müzakirələrdən sonra məsələ səsə qoyularaq üçüncü oxunuşda qəbul edilib.

Nuranə Daxilqızı