Deputat Səbinə Salmanovaya ağır itki üz verib.

“Qafqazinfo” “Unikal”a istinadən xəbər verir ki, onun atası Qədir Salmanov dünyasını dəyişib.

Mərhum sabah Sumqayıt şəhər qəbiristanlığında torpağa tapşırılacaq.

3 mərasimi isə iyulun 8-də saat 11:00-da Heydər məscidində keçiriləcək.

Həkəri çayının Zəngilan rayonu, Ağalı kəndindən keçən hissəsində batan kişinin axtarışları davam edir.

“Qafqazinfo” xəbər verir ki, məlumatla əlaqədar dərhal FHN-in Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-xilasediciləri axtarışlara cəlb olunub.

Taylandın Lopburi şəhərində yüzdən çox meymun zooparkdan qaçıb.

“Qafqazinfo” xəbər verir ki, canlıların yaşayış məntəqələrini basmağı aidiyyəti orqanları hərəkətə keçirib.

Məlumatına görə, meymunlar şəhərin küçələrində, bazar ərazilərində və yaşayış məhəllələrində görünməyə başlayıb. Heyvanların bir hissəsi mağazalara daxil olub, digərləri isə avtomobillərin üzərinə çıxaraq nəqliyyatın hərəkətinə maneələr yaradıb.

Hadisədən sonra əraziyə xüsusi qruplar cəlb edilib. Səlahiyyətlilər meymunların tutulması və təhlükəsiz zonalara köçürülməsi istiqamətində əməliyyat həyata keçirirlər.

Sosial şəbəkələrdə yayılan görüntülərdə meymunların damların üzərində qaçdığı, elektrik dirəklərinə dırmaşdığı və insanların toplandığı yerlərdə qida axtardığı əks olunub. Kadrlar qısa müddətdə geniş yayılıb və milyonlarla baxış toplayıb.

Sosial şəbəkə istifadəçiləri hadisəni məşhur “Jumanji” filmi ilə müqayisə edib.

Qeyd edək ki, sözügedən filmdə də meymunlar şəhərə axışır və burada əhalini təşvişə salır.

“AzerGold” QSC-nin fəaliyyətə başlamasının 10-cu ildönümü münasibətilə dövlət şirkəti və onun törəmə müəssisələri – “Daşkəsən Dəmir Filiz” MMC və “AzerBlast” MMC-nin rəhbər heyəti Fəxri xiyabanda Ümummilli Lider Heydər Əliyevin əziz xatirəsini dərin ehtiramla yad edib, abidəsi önünə gül dəstələri düzüblər.

“Qafqazinfo” xəbər verir ki, ziyarət çərçivəsində görkəmli oftalmoloq-alim, akademik Zərifə Əliyevanın da xatirəsi anılıb, məzarı üzərinə tər güllər qoyularaq onun elmi irsinə və insanlığa xidmət edən zəngin həyat yoluna hörmət ifadə olunub.

Daha sonra ziyarətçilər Şəhidlər xiyabanına gedərək Azərbaycanın müstəqilliyi və ərazi bütövlüyü uğrunda canından keçmiş qəhrəman Vətən övladlarının xatirəsini ehtiramla yad ediblər. Şəhidlərin məzarları önünə gül dəstələri qoyulub, onların əziz xatirəsi dərin minnətdarlıq və ehtiramla anılıb.

Qeyd edək ki, Prezident İlham Əliyevin 11 fevral 2015-ci il tarixli sərəncamına uyğun olaraq təsis edilən “AzerGold” 5 iyul 2016-cı il tarixində dövlət qeydiyyatına alınaraq, fəaliyyətə başlayıb.

Artıq 10 ildir Azərbaycanın yeraltı sərvətlərinin səmərəli və dayanıqlı idarə olunması istiqamətində fəaliyyət göstərən Səhmdar Cəmiyyəti faydalı qazıntı yataqlarının kəşfi, tədqiqi, qiymətli metalların hasilatı, yerli və beynəlxalq bazarlarda satışı ilə milli iqtisadiyyata və sosial inkişafa davamlı töhfələr verir.

Ermənistanın Baş naziri Nikol Paşinyan ölkənin yeni konstitusiyaya ehtiyacı olduğunu bir daha bəyan edib.

“Qafqazinfo” xəbər verir ki, Paşinyan bu haqda Konstitusiya Günü münasibətilə xalqa müraciətində danışıb.

O bildirib ki, yeni əsas qanunun qəbulu hakimiyyətin prioritet məsələlərindən biri olaraq qalmaqdadır:

“Yeni konstitusiyanın qəbulu Ermənistanın gələcək inkişafı üçün zəruridir. Bu, sadəcə hüquqi sənəd deyil, dövlətin gələcəyini müəyyənləşdirəcək əsasdır”.

Paşinyanın sözlərinə görə, hazırkı konstitusiya cəmiyyətdə və dövlət idarəçiliyində yaranmış bütün problemlərin həlli üçün kifayət etmir:“Vətəndaşın özünü dövlətin qurucusu kimi hiss etdiyi, hüquq və məsuliyyətlərin aydın şəkildə müəyyən olunduğu yeni konstitusiyaya ehtiyacımız var”.

Baş nazir bildirib ki, yeni konstitusiya Ermənistanın dövlət institutlarını daha da gücləndirməli, ölkənin sabit və uzunmüddətli inkişafına xidmət etməlidir.

Qeyd edək ki, bu məsələ Azərbaycan hökumətinin sülh prosesi danışıqlarında Ermənistan tərəfinin qarşısına qoyduğu ən mühüm şərtlərdən biridir.

XTQ-nin baş giziri Zaur Ələkbərovun xatirələri.

Xüsusi təyinatlıların ehtiyatda olan baş giziri Ələkbərov Zaur Zakir oğlu qısaca özüm haqqında sizlərə məlumat vermək istəyirəm.

Xüsusi təyinatlılarda ümumi xidmət müddətim 21 il 6 ay olmuşdur. Bu illər ərzində çoxsaylı əməliyyatlarda və döyüşlərdə iştirak etmişəm. 2012-ci ildən 2016-cı ilədək düşmənin dərinliklərində dəfələrlə hücum qruplarının tərkibində kəşfiyyat əməliyyatları icra etmişəm.

2016-cı ilin Aprel döyüşlərinin iştirakçısıyam.

2020-ci il 44 günlük Vətən müharibəsinin ilk günündən son gününədək döyüşlərdə iştirak etmişəm. 2020-ci ilin dekabr ayında Xocavənd əməliyyatında 62 erməni əsirinin ələ keçirilməsi əməliyyatının iştirakçısı olmuşam.

2021-ci ildə Kəlbəcər istiqamətində dövlət sərhədlərinin bərpası üzrə həyata keçirilən əməliyyatların iştirakçısı olmuşam.

2022-ci ildə Kəlbəcər ərazisində keçirilən 4 günlük sarsıdıcı zərbə əməliyyatının iştirakçısı olmuşam.

2023-cü ildə keçirilən antiterror əməliyyatının iştirakçısıyam.

Xüsusi təyinatlı qüvvələr ailəsinə qatılmadan öncə insan min dəfə ölçüb-biçməli, sonra bu yolu seçməlidir. Çünki ilk öncə hara getdiyini, hansı qurumun kursuna qatıldığını və necə bir həyatın içinə daxil olacağını anlamalısan. Xüsusi təyinatlı qüvvələr sadəcə bir peşə deyil, bu bir həyat tərzi, bir iradə məktəbi və Vətənə verilən sədaqət andıdır.

Xüsusi təyinatlı olmaq sadəcə bir qurumun geyimini geyinmək, başına bordo beret qoymaq, sol böyrünə bıçaq, sağ böyrünə silah taxmaq demək deyil. Bunlarla insan xüsusi təyinatlı olmur. Xüsusi təyinatlı olmaq üçün illər lazımdır — ağır təlimlər, çətin tapşırıqlar, saysız-hesabsız sınaqlar, gecə-gündüz məşqlər və iradəni sındıran anlar lazımdır. Çünki burada insanın təkcə fiziki gücü yox, ruhu, iradəsi, sədaqəti və Vətən sevgisi sınanır.

Bu qüvvələrdə “acmışam”, “yorulmuşam”, “yuxusuzam”, “hava çox soyuqdur”, “qar yağır”, “borandır”, “gedə bilmirəm”, “dözə bilmirəm” kimi anlayışlar olmur. Əvvəlcə insan psixoloji olaraq hər çətinliyə hazır olmalıdır. Çünki xüsusi təyinatlı qüvvələr ailəsinə qoşulmaq üçün sən həyatında bir çox şeyləri torpağın, bayrağın, dövlətin və ailən naminə qurban verməlisən.

Sən artıq bir çox şeylərdən məhrum olacaqsan və olursan da. Yaxşı istirahətlər, rahat həyat, restoranlar, parkda gəzmək, xarici ölkələrdə dincəlmək… Sənin istirahətin dağlarda, dərələrdə, palçıqda, qarda və yağışın altında keçəcək. Bəzən günlərlə yuxusuz qalacaqsan, bəzən bir tikə çörəyə möhtac olacaqsan, amma yenə də tapşırıqdan geri dayanmayacaqsan. Çünki sən artıq özünü yox, dövlətini düşünən insan olacaqsan.

Bəzən ailəndən uzaqda olacaqsan. Ən yaxınlarının yanında ola bilməyəcəksən. Bayram günlərini səngərdə, gecələri pusquda keçirəcəksən. Sənin üçün zaman anlayışı dəyişəcək. Çünki xüsusi təyinatlı üçün ən önəmli məsələ tapşırığın uğurla icra olunmasıdır.

Çünki sənə verilən tapşırıq Azərbaycanın ərazi bütövlüyünü və dövlətimizin suverenliyini qorumaq olacaq. Düşmən dərinliklərində tapşırıqlar icra edəcəksən. Elə tapşırıqlar olacaq ki, adın bilinməyəcək, gördüyün işlər gizli qalacaq, amma dövlətin və millətin sənin xidmətini hər zaman hiss edəcək.

Hər dəfə tapşırığa gedəndə düşünmə ki, getdiyin kimi də geri qayıdacaqsan. Xeyr… belə bir zəmanət yoxdur. Çünki bu yol ölümün gözünün içinə baxaraq irəliləməkdir. Bu yol qorxunu məğlub edib tapşırığı sona qədər yerinə yetirməkdir.

Qayıdacaqsan… Amma necə qayıdacağını heç kim bilmir. Geri dönməyin üç yolu var:

Birincisi — getdiyin kimi sağlam şəkildə qayıtmaq.

İkincisi — yaralı qayıtmaq, əlini, ayağını itirərək dönmək. Necə ki, 44 günlük Vətən müharibəsində bunu yaşayan igidlərimiz oldu.

Üçüncüsü isə — sənin nəşinin qayıtmasıdır. Yenə də 44 günlük Vətən müharibəsində olduğu kimi...

Bəli, bu yol ağırdır. Bu yol qorxu, ağrı, həsrət və çətinliklə doludur. Amma bu yolun sonunda Vətən sevgisi, şərəf və qürur dayanır. Çünki xüsusi təyinatlı olmaq hər adamın bacaracağı iş deyil. Bu adı daşımaq üçün ürək lazımdır, sədaqət lazımdır, Vətən üçün canından keçməyi gözə almaq lazımdır.

Nə qədər ağır olsa da, bir o qədər də şərəflidir xüsusi təyinatlı qüvvələrdə xidmət etmək. Çünki sən artıq təkcə öz həyatını yaşamırsan, sən bir millətin güvənini daşıyırsan.

Bəli, bizlər heç vaxt rahat yatmağı, rahat yeməyi, gəzməyi düşünmədik. Bizim bir amalımız oldu — dövlətimizə, millətimizə, torpağımıza və Müzəffər Ali Baş Komandanımıza xidmət etmək, onun etimadını doğrultmaq. Biz bilirdik ki, bizim rahat yatmadığımız gecələrdə xalqımız rahat yatacaq. Biz bilirdik ki, bizim çəkdiyimiz əziyyət dövlətimizin gücü və xalqımızın təhlükəsizliyi üçündür.

44 günlük Vətən müharibəsində Azərbaycan əsgəri və xüsusi təyinatlıları bütün dünyaya göstərdi ki, bu xalq öz torpağı uğrunda son nəfəsinə qədər döyüşməyi bacarır. O savaşda şəhid olan qardaşlarımız bizim baş tacımız, qazilərimiz isə yaşayan qəhrəmanlarımız oldular.

Məhz xüsusi təyinatlı qüvvələrdə də bu məqsədlə xidmət etməlisən. Çünki bu yolun sonunda ya qəhrəmanlıq var, ya da şəhidlik. Hər iki halda isə sən artıq Vətən üçün yaşayan və Vətən üçün döyüşən bir ömür yazmış olursan.

Vətən sağ olsun!