Azərbaycanın beynəlxalq münasibətlər sistemində mövcud reallığa əsaslanan xarici siyasət kursunda milli maraqların təmin edilməsi hər zaman dəyişməz prinsip olaraq qalır. Hazırda ölkəmizin qlobal nüfuzu, ölkələrlə qurduğu münasibətlər və beynəlxalq təşkilatlarda təmsilçiliyi Prezident İlham Əliyevin illər ərzində məhz milli maraqların qorunması konsepsiyasına əsaslanan xarici siyasət kursunun real nəticələridir.

Bu prosesin inkişaf istiqamətini iki mərhələdə qiymətləndirmək olar.

Birinci mərhələ 2020-ci ilə qədər - torpaqlarımızın işğalda olduğu dövr idi. Prezident İlham Əliyev ölkəyə rəhbərlik etməyə başladığı 2003-cü ildən etibarən ərazi bütövlüyümüzün təmin edilməsi hədəfinə doğru addım-addım yaxınlaşırdı, ölkələr və beynəlxalq təşkilatlarla münasibətlərin qurulmasında da prioritet məqsəd bu olub. 2020-ci ilə qədərki xarici siyasət “balanslı kurs” olaraq qiymətləndirilirdi və politoloji təhlillər bunun nə qədər doğru strategiya olduğunu dəfələrlə isbat edib. Çünki bölgədə hadisələrin Qarabağ fokuslu inkişaf etməsi və həm regional, həm qlobal oyunçuların Cənubi Qafqaza münaqişə üzərindən yaxınlaşması rəsmi Bakını çoxgedişli kombinasiyaya əsaslanan siyasəti izləməyə vadar edirdi. Və Prezident İlham Əliyev bu mürəkkəb vəziyyəti ustalıqla nəzarətdə saxlayaraq, hadisələrin inkişafını milli maraqlarımıza uyğunlaşdıra bildi. 2020-ci ildə Vətən müharibəsi ilə torpaqlarımızın azad edilməsi, ardınca suverenliyimizin bərpası və bölgədə Azərbaycan vektorlu yeni reallıqların formalaşması bunun əyani nümunəsidir.

İkinci mərhələ post-münaqişə dövrüdür. Artıq ərazi bütövlüyü və suverenliyini bərpa etmiş Azərbaycan beynəlxalq münasibətlər sistemində mərkəzçi rolunda çıxış edir. Azərbaycan orta güc konsepsiyasına əsaslanan bu rolu çoxtərəfli diplomatiyası nəticəsində üzərinə götürüb, daha dəqiq desək, rəsmi Bakı bütün qlobal rəqabət tərəfləri üçün birləşdirici-mərkəzçi oyunçu hesab olunur.

Bu mərhələdə Azərbaycan qlobal və regional güclərlə bərabərhüquqlu münasibətlər müstəvisində hərəkət edir, geosiyasi proseslərə yön vermək, bir çox hallarda rəqabət tərəfləri arasında körpü olmaq, dialoq platforması yaratmaq missiyasından çıxış edir. Buna paralel şəkildə Azərbaycan qlobal problemlərin – buraya ərzaq təhlükəsizliyi, iqlim problemləri və bu kimi məsələlər daxildir, həllinə öncüllük edir.

Prezident İlham Əliyevin “yol xəritəsi”nə əsaslanan bu siyasət Azərbaycanı geosiyasi proseslərin nüfuzlu oyunçusuna çevirib. Bunun əsas nəticələrindən biri Azərbaycanın son iki ildə beynəlxalq seçkilərdə əldə etdiyi qələbələrdir.

2025-ci ildə əldə olunan nəticələr

Ötən il Azərbaycan beynəlxalq qurumların idarəetmə orqanlarına irəli sürdüyü 14 namizədliyində də uğur qazanıb. Bura BMT-nin Məskunlaşma Proqramı (UN-Habitat) və digər qurumları, eləcə də UNESCO, İSESCO, Ümumdünya Heyvan Sağlamlığı Təşkilatı (ÜHST) kimi nüfuzlu təşkilatlar daxildir. Beynəlxalq seçkilərdə 100 faizlik nəticə göstərən Azərbaycanın əsas fəaliyyət istiqamətləri dayanıqlı inkişaf, turizm, miqrasiya, sosial inkişaf, ətraf mühit, mədəni irs və humanitar əməkdaşlıq kimi geniş sferanı əhatə edir. Beynəlxalq təşkilatlarda geniş təmsilçiliyimiz təkcə milli maraqlarımızın təmin edilməsinə yox, eyni zamanda, rəsmi Bakının prioritetlərindən olan qlobal problemlərin həllinə töhfə vermək imkanlarını da yaradır.

2026-cı ilin cari dövründə əldə olunan nəticələr

Təkcə iyun ayında Azərbaycan BMT-nin Qadınlara qarşı ayrı-seçkiliyin aradan qaldırılması üzrə Komitəsi (CEDAW), İnsan Hüquqları üzrə Komitə (ICCPR) və Uşaq Hüquqları Komitəsinə (CRC) keçirilən seçkilərdə maksimum nəticə əldə edib. Bununla yanaşı, əvvəlki illərdə keçirilmiş seçkilərin nəticəsinə uyğun olaraq, İqtisadi, Sosial və Mədəni Hüquqlar üzrə Komitə (CESCR) və Əməkçi Miqrantlar üzrə Komitədə (CMW) təmsilçilik qazanıb. Beləliklə, Azərbaycan nümayəndələri BMT insan hüquqları üzrə mövcud olan 10 müqavilə qurumundan 5-də təmsil olunur. Bu, Azərbaycanın BMT üzvləri arasında Çinlə ikinci və üçüncü yerləri bölüşdürməsi deməkdir.

Rəsmi Bakının çoxtərəfli diplomatiyası və etibarlı tərəfdaşlıqlar qurması nəticəsində əldə olunan bu nəticələr üç kontekstdə xüsusi əhəmiyyət kəsb edir:

1. Qlobal proseslərə birbaşa təsir edən qərarların qəbul edilməsində Azərbaycanın rolu güclənir;

2. Azərbaycan beynəlxalq gündəliyin formalaşmasında seyirçi yox, birbaşa iştirakçıya – qərarvericiyə çevrilir;

3. Regional liderliyi üzərinə götürən ölkəmiz orta güc olaraq, qlobal oyunçular arasına daxil olur.

Məsələyə konkret nümunələr üzərindən də baxa bilərik. BMT-nin müxtəlif qurumlarının rəhbərliyində təmsilçilik o deməkdir ki, Azərbaycan bir, yaxud bir neçə yox, çoxsaylı qlobal istiqamətlər – turizm, səhiyyə, ekologiya, insan hüquqları və s. üzrə qərarverici aktordur. UNESCO-da qərarqəbuletmə prosesində iştirak ölkəmizin mədəni irsin qorunması və təşviqi sahəsində beynəlxalq rolunu daha da gücləndirir. Ki, bu xüsusilə “yumşaq güc” strategiyası kontekstində əhəmiyyətlidir. Azərbaycanın beynəlxalq seçkili orqanlarında əldə etdiyi uğurlar və qlobal qərarların qəbul edilməsində rolunun güclənməsi milli maraqlarımızın daha geniş platformalarda təmin edilməsi imkanlarını da genişləndirir.

Axar.az

“Psixiatriya yardımı haqqında” qanuna təklif edilən dəyişikliklər insan azadlığı, şəxsi toxunulmazlıq, rəsmi orqanların müdaxilə sərhədləri və cəmiyyətin təhlükəsizliyi kimi olduqca həssas məsələləri əhatə edir”.

“Qafqazinfo” xəbər verir ki, bunu Milli Məclisin növbədənkənar sessiyası çərçivəsində keçirilən bugünki iclasında “Psixiatriya yardımı haqqında” qanun layihəsinin müzakirəsi zamanı İnsan hüquqları komitəsinin sədri Zahid Oruc bildirib.

Komitə sədri qeyd edib ki, ağır psixi böhran keçirən, özünə və ya ətrafındakılara təhlükə yaradan bir insanın qarşısında dayananda rəsmi orqanlar iki seçimlə üz-üzə qalır: ya müdaxilə etmək, yaxud kənarda qalmaq: “Şəxs razılıq vermədi” deyərək hadisəni izləmək məsuliyyətdən imtina etmək deməkdir.

Layihədə psixiatriya yardımı haqqında məlumatların elektron sağlamlıq kartında saxlanılması, şəxsin həmin məlumatları elektron sistemdən əldə etməsi, qanuni nümayəndəyə məlumatın iki iş günü ərzində verilməsi, müalicədən imtinanın sistemdə rəsmiləşdirilməsi, tibbi xarakterli məcburi tədbirlərə cəlb edilən şəxslərin digər pasiyentlərdən ayrı müalicə olunması, yaxın qohumların və qanuni nümayəndələrin dərhal məlumatlandırılması kimi müddəalar vardır. Göründüyü kimi, son dərəcə mühüm olan tədbirlər tibbi prosesin sənədləşdirilməsi, izlənilməsi və məsuliyyətin artırılmasına xidmət edir.

Lakın layihə ətrafında süni şəkildə ajiotaj yaradan və ondan dövlət hakimiyyəti orqanları əleyhinə istifadə edən qüvvələr bir müddəa - inzibati xəta haqqında icraat aparılan şəxsin razılığı olmadan psixiatriya müayinəsinə göndərilməsi ilə bağlı kampaniya aparırlar.
Müzakirə edilən müddəanı sovet dövrünün cəza psixiatriyası ilə müqayisə edən Cəmil Həsənli və onun kimi düşünənlər səlahiyyətləri olsaydı, bütün siyasi rəqiblərinə repressiya tətbiq edərdilər. Halbuki Zəfərimizi belə tanımayan qüvvələr qanunun mətnini diqqətlə oxusaydılar, üç mühüm məqam aydın görərdilər:

Birincisi, söhbət istənilən vətəndaşdan və ya siyasi fəaldan getmir, barəsində inzibati xəta haqqında icraat aparılan şəxsdən gedir.

İkincisi, psixiatriya yardımının gecikdirilməsinin şəxsin özünün və ya başqa şəxslərin həyat və sağlamlığı üçün təhlükə yaratması şərti mövcud olmalıdır.

Üçüncüsü, prokuror və ya digər səlahiyyətli vəzifəli şəxs psixi xəstəlik diaqnozu qoymur. O, yalnız müayinənin aparılması barədə prosedur qərarı qəbul edir. Psixi pozuntunun olub-olmamasını həkim-psixiatr müəyyənləşdirir”.

Deputatın sözlərinə görə, inzibati orqanın qərarı tibbi diaqnoz sayılmır, müayinə hospitalizasiya anlamına gəlmir, hospitalizasiya da müddətsiz azadlıqdan məhrumetmə kimi qiymətləndirilə bilməz: “Qüvvədə olan qanunvericiliyə görə, qeyri-könüllü psixiatriya stasionarına yerləşdirilən şəxs 48 saat ərzində həkim-psixiatr komissiyası tərəfindən müayinə edilməli, hospitalizasiyanın əsaslılığı müəyyənləşdirilməli və məsələ məhkəmə qarşısına çıxarılmalıdır. Şəxsin etiraz hüququ mövcuddur. Deməli, inzibati qərar yalnız prosesi başladır - onu davam etdirmək səlahiyyəti nə prokurorda, nə inzibati orqanda, nə də həkimdə yoxdur.

Qərarqəbuletmə səlahiyyəti yalnız məhkəməyə məxsusdur.

Bəs demokratik dövlətlər ağır psixi böhran keçirən, özünə və ya başqalarına təhlükə yaradan şəxslərlə bağlı necə davranırlar? Böyük Britaniyanın Psixi Sağlamlıq Aktının 136-cı maddəsinə əsasən, polis ictimai yerdə psixi pozuntu əlamətləri göstərən və təcili qayğıya və ya nəzarətə ehtiyacı olan şəxsi, onun özünü və ya başqalarını qorumaq məqsədilə təhlükəsiz yerə aparır. Şəxs orada həkim və təsdiqlənmiş psixi sağlamlıq mütəxəssisi tərəfindən qiymətləndirilir. 2025-ci ildə qəbul edilən islahatlar məcburi müdaxilənin zəruriliyinə, müalicəvi faydasına, pasiyentin prosesdə iştirakına və qərarların daha tez-tez yoxlanılmasına əlavə təminatlar gətirib.

Fransada razılıq olmadan psixiatriya yardımı şəxsin psixi vəziyyəti onun razılıq verməsini mümkünsüz etdikdə və dərhal tibbi yardım tələb olunduqda tətbiq edilə bilər. Adi prosedurda iki əsaslandırılmış tibbi rəy tələb olunur və ilk rəyi pasiyenti qəbul edən müəssisədən kənar həkim verməlidir. İctimai təhlükəsizliklə bağlı hallarda prefekt qərar qəbul edə bilər, lakin qərar yenə müstəqil tibbi sənədə əsaslanır.

Nümunələr bir həqiqəti təsdiqləyir: şəxsin razılığı olmadan təcili psixiatriya müayinəsi Azərbaycanda yox, insan hüquq və azadlıq qanunlarını yazan Qərb ölkələrində düşünülüb. Fransada prefektin, Böyük Britaniyada polisin, Azərbaycanda isə prokurorun prosesi başlatması - üç sistemdə də inzibati orqan ilkin qərar verir. Üç sistemdə də diaqnozu inzibati orqan yox, müstəqil həkim qoyur.

Təcridetmə və fiziki məhdudlaşdırma isə cəza üsulu sayıla bilməz. Belə tədbir yalnız bilavasitə təhlükənin başqa üsulla aradan qaldırılması mümkün olmadıqda, ən qısa müddətdə, tibbi nəzarət altında sənədləşdirilməklə tətbiq olunmalıdır.

Layihədə tibbi xarakterli məcburi tədbirlərə cəlb olunan şəxslərin digər pasiyentlərdən ayrı müalicəsi nəzərdə tutulur. Lakin həmin məcburi tədbir təhlükəsizlik məqsədi daşıyır, təkadamlıq, müddətsiz və cəzalandırıcı saxlanmaya çevrilə bilməz.

Həmin insanın iradəsi xəstəliyin təsiri altında formalaşırsa, onun həyatını xilas etmək üçün müvəqqəti müdaxilə insan hüququnun pozulması deyil, yaşamaq hüququnun qorunmasıdır.

Ona görə də layihə siyasi məqsəd daşımır, şəxsin, cəmiyyətin təhülkəsizliyi üçün dünyada mövcud olan qabaqcıl təcrübənin tətbiqidir və ona müsbət səs verəcəyik”.

Nuranə Daxilqızı

“Layihədə elektron sağlamlıq kartında məlumatların saxlanılması nəzərdə tutulsa da, həmin məlumatlara hansı dövlət orqanlarının və hansı əsaslarla çıxış əldə edə biləcəyi, məlumatların saxlanma müddəti, onların qorunması mexanizmləri, habelə qanunsuz istifadəyə görə məsuliyyət məsələləri kifayət qədər ətraflı tənzimlənməyib”.

“Qafqazinfo” xəbər verir ki, bunu deputat Vasif Qafarov Milli Məclisin növbədənkənar sessiyası çərçivəsində keçirilən bugünkü iclasında “Psixiatriya yardımı haqqında” qanun layihəsinin müzakirəsi zamanı bildirib.

“Nəzərə alınmalıdır ki, psixi sağlamlıqla bağlı məlumatlar xüsusi kateqoriyalı şəxsi məlumatlar hesab olunur və onların mühafizəsi daha yüksək hüquqi təminat tələb edir.

Layihədə bir sıra müddəalarda istifadə edilən “dərhal məlumat verilir” ifadəsi də, hesab edirəm ki, hüquqi müəyyənlik baxımından konkretləşdirilməlidir. Bu anlayışın dəqiq vaxt meyarı ilə müəyyən edilməməsi praktikada müxtəlif yanaşmalara səbəb ola bilər. Bu baxımdan hesab edirəm ki, məlumatın, məsələn, “3 saatdan gec olmayaraq” və ya “24 saat ərzində” təqdim edilməsinin qanunda dəqiq göstərilməsi məqsədəuyğun olardı.

Həmçinin, layihədə digər pasiyentlərin və şəxsin özünün təhlükəsizliyinin təmin edilməsi məqsədilə təcrid tədbirinin tətbiqi nəzərdə tutulsa da, həmin təcridin maksimum müddəti, uzadılması qaydası, həkim komissiyası tərəfindən yenidən qiymətləndirilməsi və bu proses üzərində nəzarət mexanizmi müəyyən edilməyib. Bu məsələlərin qanunvericilikdə əks etdirilməsi insan hüquqlarının müdafiəsi baxımından əlavə təminat yaradardı.

Layihədə prokurorun məlumatlandırılması və müəyyən qərarlar qəbul etməsi ilə bağlı müddəalar nəzərdə tutulsa da, həmin qərarların forması, onlardan şikayət verilməsi qaydası və məhkəmə nəzarətinin həyata keçirilməsi mexanizmi tam şəkildə tənzimlənməyib. Bu məsələlərin dəqiqləşdirilməsi hüquqi müəyyənliyin təmin olunmasına xidmət edər.

Bundan əlavə, layihədə təhlükəsizlik tədbirlərinin tətbiqi geniş şəkildə tənzimlənsə də, pasiyentin hüquqlarının qorunmasına dair əlavə təminatların nəzərdə tutulması da məqsədəuyğun olardı. Xüsusilə hüquqi yardım almaq, vəkil cəlb etmək, yaxın qohumları ilə əlaqə saxlamaq, psixoloji dəstək almaq və qəbul edilmiş qərarlardan şikayət vermək hüquqlarının ayrıca vurğulanması qanunun insan hüquqlarına əsaslanan balanslı tətbiqini təmin edər.

Layihənin daha da təkmilləşdirilməsi məqsədilə elektron sağlamlıq kartının tətbiqi, məlumatların qorunması, onlara çıxış qaydaları, audit mexanizmi və kibertəhlükəsizlik tələblərini tənzimləyən ayrıca normanın əlavə edilməsi də məqsədəuyğun olardı.

Eyni zamanda, məcburi hospitalizasiya edilən şəxslərin müəyyən müddət keçdikdən sonra müstəqil psixiatr tərəfindən təkrar müayinəsinin nəzərdə tutulması da səhv diaqnoz və ya əsassız məhdudiyyət riskinin azaldılmasına xidmət edər.

Bundan başqa, psixiatriya müəssisələri ilə məhkəmələr arasında elektron məlumat mübadiləsi sisteminin yaradılması qərarların icrasını sürətləndirə və sənəd dövriyyəsinin operativliyini artıra bilər.

Həmçinin, məcburi hospitalizasiya, məcburi müayinə və təcrid tədbirləri üzrə anonim statistik məlumatların hər il ictimaiyyətə açıqlanmasının nəzərdə tutulması qanunun tətbiqinin effektivliyinin qiymətləndirilməsinə və gələcək qanunvericilik islahatlarının əsaslandırılmasına kömək edər”, - deputat qeyd edib.

Nuranə Daxilqızı

Əmlakı üzərinə həbs qoyulan şəxslərlə bağlı qanunvericiliyə dəyişiklik olunur.

“Qafqazinfo” xəbər verir ki, bu, Cinayət-Prosessual Məcəlləsinə təklif olunan dəyişiklikdə öz əksini tapıb.

Layihəyə əsasən, təqsirləndirilən şəxs olmayan, lakin əmlak üzərinə həbs qoyulması barədə cinayət prosesini həyata keçirən orqanın qərarı ilə qanuni mənafeyinə toxunulan fiziki şəxs məlum olan sonuncu yaşayış yeri, hüquqi şəxs isə yerləşdiyi ünvan üzrə cinayət prosesini həyata keçirən orqan tərəfindən bildiriş göndərilməklə məlumatlandırılacaqlar.

Cinayət prosesini həyata keçirən orqan bu Məcəllənin 99-1.1-ci maddəsində şəxsin göstərilən müraciətinə əsasən 3 (üç) gündən gec olmayaraq onun əmlak üzərinə həbs qoyulması barədə cinayət prosesini həyata keçirən orqanın qərarı ilə qanuni mənafeyinə toxunulan şəxs qismində cinayət prosesinə cəlb edilməsi barədə qərar qəbul edəcək.

Əmlak üzərinə həbs qoyulması barədə cinayət prosesini həyata keçirən orqanın qərarı ilə qanuni mənafeyinə toxunulan şəxs bu Məcəllədə nəzərdə tutulmuş hallarda və qaydada aşağıdakı hüquqları həyata keçirəcək:

- cinayət işinə əlavə edilməsi və məhkəmə iclasında tədqiq olunması üçün sübutlar və digər materiallar təqdim etmək;

- etirazlar etmək və vəsatətlər vermək;

- birinci ve apellyasiya instansiyası məhkəmələrinin iclaslarında və işin materiallarının tədqiqində iştirak etmək;

- qanuni mənafeyinə toxunan şikayəti ilə cinayət işinə kassasiya, əlavə kassasiya qaydasında və ya hüquq və azadlıqların pozulması ilə bağlı yeni hallar və yeni açılmış hallar üzrə baxılmasında və cinayət işi materiallarının tədqiqində iştirak etmək, yaxud cinayət prosesinin digər iştirakçısının şikayətinə öz etirazını bildirmək;

- məhkəmə iclasında cinayət prosesinin digər iştirakçıları tərəfindən verilmiş vəsatət və təkliflər, habelə məhkəmə tərəfindən həll edilən məsələlər üzrə öz fikrini bildirmək;

- nümayəndəyə malik olmaq və onun səlahiyyətlərinə xitam vermək;

- ana dilində və ya bildiyi başqa dildə ifadə (izahat) vermək;

- cinayət prosesini həyata keçirən orqan tərəfindən qəbul edilmiş, onun hüquq və qanuni mənafeyinə toxunan qərarlar haqqında həmin orqan tərəfindən məlumatlanmaq və öz xahişi ilə həmin qərarların surətlərini almaq;

- əmlak üzərinə həbs qoyulması barədə cinayət prosesini həyata keçirən orqanın qərarı ilə qanuni mənafeyinə toxunulan şəxs qismində cəlb edilməsi barədə qərarın çıxarılıb- çıxarılmamasından asılı olmayaraq, xüsusi müsadirəni və ya mülki iddianı təmin etmək məqsədilə əmlak üzərinə həbs qoyulmasından məhkəmə nəzarətinin həyata keçirilməsi qaydasında, habelə xüsusi müsadirənin tətbiq olunması, mülki iddianı təmin etmək məqsədilə əmlak üzərinə həbs qoyulması hissəsində məhkəmənin hökmü və ya digər yekun qərarından apellyasiya, kassasiya və ya əlavə kassasiya qaydasında şikayət vermək.

Əmlak üzərinə həbs qoyulması barədə cinayət prosesini həyata keçirən orqanın qərarı ilə qanuni mənafeyinə toxunulan şəxs bu Məcəllədə nəzərdə tutulmuş hallarda və qaydada aşağıdakı vəzifələri yerinə yetirməlidir:

- cinayət prosesini həyata keçirən orqanın çağırışı ilə gəlmək;

- təhqiqatçının, müstəntiqin, prokurorun və ya məhkəmə iclasında sədrlik edənin göstərişlərinə tabe olmaq;

- məhkəmə iclasında sədrlik edənin icazəsi olmadan fasilə elan edilənədək məhkəmənin iclas zalını tərk etməmək;

- məhkəmə iclasında qaydaya riayət etmək;

- şəxsi həyatın toxunulmazlığına, ailə, dövlət, peşə, kommersiya və ya qanunla qorunan digər sirlərə toxunan hallar barədə məlumatları yaymamaq.

Müzakirələrdən sonra məsələ səsverməyə qoyularaq üçüncü oxunuşda qəbul edilib.

Nuranə Daxilqızı

Naxçıvan Muxtar Respublikasında Prezidentin səlahiyyətli nümayəndəliyi 1-ci kateqoriya dövlət orqanı statusuna malik olacaq.

“Qafqazinfo” xəbər verir ki, bununla bağlı Prezident İlham Əliyev “Dövlət qulluğu haqqında” qanuna dəyişiklikləri təsdiqləyib.

Belə ki, Naxçıvan MR-də Azərbaycan Prezidentinin səlahiyyətli nümayəndəsinin köməkçisi vəzifəsi üçüncü təsnifat vəzifələr siyahısına daxil edilib.

Qanun iyulun 1-dən qüvvəyə minir.

Dövlət başçısı həmçinin Naxçıvanda Azərbaycan Prezidentinin səlahiyyətli nümayəndəliyinin fəaliyyətinin təkmilləşdirilməsi ilə bağlı əlavə tədbirlər haqqında Fərman da imzalayıb.

Fərmanla səlahiyyətli nümayəndəliyin strukturu təsdiqlənib. Beləliklə, səlahiyyətli nümayəndəliyin işçilərinin say həddi 55 ştat vahidi müəyyən edilib. Nazirlər Kabinetinə Azərbaycan Prezidentinin aktlarının bu Fərmana uyğunlaşdırılması ilə bağlı təkliflərini iki ay müddətində hazırlayıb dövlət başçısına təqdim etmək tapşırılıb.

“İsrail hökumətinin qondarma “erməni soyqırımı” ilə bağlı qəbul etdiyi qərar ciddi narahatlıq doğurur”.

“Qafqazinfo” xəbər verir ki, bu barədə Azərbaycan Xarici İşlər Nazirliyinin məsələ ilə bağlı şərhində deyilir.

Bildirilib ki, 1915-ci il hadisələri ilə bağlı tarixi həqiqətlərin təhrif olunması, mürəkkəb tarixi proseslərin hüquqi və elmi əsaslardan uzaq şəkildə siyasi qərar predmetinə çevrilməsi qəbuledilməzdir: “Bu kimi addımlar barışıq və qarşılıqlı anlaşmaya deyil, mövcud ziddiyyətlərin daha da dərinləşməsinə xidmət edir, regionda davamlı sülh və barışıq səylərinə mane olur.

İsrail hökumətini qəbul etdiyi bu qərarı yenidən nəzərdən keçirməyə çağırırıq.

Azərbaycan tarixi həqiqətlərin müdafiəsi, beynəlxalq hüququn prinsiplərinə hörmət və regionda davamlı sülhün təşviqi istiqamətində ardıcıl mövqeyini bundan sonra da davam etdirəcək”.

“İsrail hökumətinin qondarma “erməni soyqırımı” ilə bağlı qəbul etdiyi qərar ciddi narahatlıq doğurur”.

“Qafqazinfo” xəbər verir ki, bu barədə Azərbaycan Xarici İşlər Nazirliyinin məsələ ilə bağlı şərhində deyilir.

Bildirilib ki, 1915-ci il hadisələri ilə bağlı tarixi həqiqətlərin təhrif olunması, mürəkkəb tarixi proseslərin hüquqi və elmi əsaslardan uzaq şəkildə siyasi qərar predmetinə çevrilməsi qəbuledilməzdir:

“Bu kimi addımlar barışıq və qarşılıqlı anlaşmaya deyil, mövcud ziddiyyətlərin daha da dərinləşməsinə xidmət edir, regionda davamlı sülh və barışıq səylərinə mane olur.

İsrail hökumətini qəbul etdiyi bu qərarı yenidən nəzərdən keçirməyə çağırırıq.

Azərbaycan tarixi həqiqətlərin müdafiəsi, beynəlxalq hüququn prinsiplərinə hörmət və regionda davamlı sülhün təşviqi istiqamətində ardıcıl mövqeyini bundan sonra da davam etdirəcək”.

Milli Təhlükəsizlik Nazirliyinin (ləğv edilib-red.) Antiterror Mərkəzinin rəisi işləmiş general Elçin Quliyev uzunmüddətli həbsdən sonra azadlığa çıxıb.

“Qafqazinfo”nun əldə etdiyi məlumata görə, general 10 il 6 aylıq həbs müddətini günə-gün başa vurub.

O, cəzasını sona qədər 9 saylı cəzaçəkmə müəssisəsində, ciddi rejim şəraitində çəkib.

Xəbəri rus dilində oxuyun: Генерал Гулиев полностью отбыл 10-летний срок

Qeyd edək ki, MTN-in vaxtlarında yüksək vəzifələrdə çalışan E.Quliyev 2015-ci ildə həbs edilib. O, rüşvət alma, hədə-qorxu ilə tələb etmə, quldurluq, qanunsuz azadlıqdan məhrumetmə və başqa ağır cinayətlərdə təqsirli bilinib.

Sail Ağasəlim